понтонды парк

(Понтонный парк)

жүзбелі көпірлерді салу, сондай-ақ тасымалданатын сал қайықтарды жинауға арналған техникалық құралдар кешені. П.п-тер жеңіл — жүк көтергіштігі 25 т-ға дейін және ауыр — 40—80 т болып бөлінеді. П.п. сал қайықты-көпір конструкцияларынан, көліктік құралдардан, моторлы су құралдарынан және көмекші құрал-жабдықтардан тұрады. Сал қайықты-көпір конструкциялар понтондардан, тіреуші және жүргінші бөліктерден, кемежай элементтерінен тұруы мүмкін. Тіреуші конструкциялар ретінде прогондар (бөренелер), фермалар немесе қазықтардан жиналатын аралық құрылыстар қолданылады. Жүргінші бөлігі ағаштан (қалқаннан) немесе металдан жасалады. Көліктік құралдар көп жағдайда жоғары өтпелі автомобильдер болып табылады. Моторландырғыш құралдар ретінде көпірлер салу үшін және сал қайықтарды жылжыту үшін қолданылатын катерлер қызмет етеді. Бірқатар П.п-терде көбінесе үрлемелі понтондармен бірге кемердің сыртын-дағы агрегаттар қолданылады. Көмекші құрал-жабдықтар мен қосымша құрылғыларға крандар, жол төсеніштер, зәкірлер, анкерлер, жабдықтар жинағы, жабдықтар және т.б. жатады. Кейбір армияларда өздігінен жүретін (амфибия-лық, шабуылдық) П. п. болады. Өздігінен жүретін П.п-те негізгі элементтердің барлығы амфибия-машинасына біріктіріледі. Понтондардың конструкциясына қарай П.п-тен жеке жүзбе тірегі бар жүзбелі көпірлер және жүзбелі таспалы-көпірлер жасалуы мүмкін.

Соғыстан кейінгі кезеңдерде, негізінен, жаңа типтегі понтонды көпірлі парк (ПКП) құрылды. Мұнда жиылмалы буындардан таспалы-көпірлер мен таспалы-сал қайықтар жиналады. ПКП әскерлердің өткелден өтуін едәуір тездетеді.